ភ្នំពេញៈ
នៅពេលអាជ្ញាធរថៃហាមការនាំចូលដំឡូងពីកម្ពុជាដើម្បីជួយដល់កសិកររបស់គេ
កសិករខ្មែរនៅតាមបណ្ដោយព្រំដែនជាប់នឹងប្រទេសថៃធ្លាក់ទៅក្នុងភាពអស់សង្ឃឹមដោយសារតែមិនអាចលក់ផលិតផលរបស់ខ្លួនបាន
ឬលក់បានក្នុងតម្លៃទាបទៅឲ្យឈ្មួញកណ្តាល។
ចាប់តាំងពីយើងនិយាយអំពីដំឡូង
វាអស់រយៈពេលជាច្រើនឆ្នាំមកហើយ
ហើយវាក្លាយជារឿងធម្មតាសម្រាប់កសិករខ្មែរដែលរង់ចាំតែប្រទេសជិតខាងដូចជាថៃ
និងវៀតណាម ខណៈបញ្ហាមិនត្រូវបានដោះស្រាយ។
នេះជាការត្អូញត្អែររបស់តំណាងសហគមន៍ដំឡូងមីនៅខេត្តប៉ៃលិន។
អ្នកស្រី ស៊ុំ ហៀង
ប្រធានសមាគមដំឡូងខេត្តប៉ៃលិន
ដែលមានកសិករ៥២គ្រួសារជាសមាជិកបានឲ្យដឹងថា
កសិកម្មដំឡូងមីកម្ពុជាកំពុងជម្នះការពិបាកអស់រយៈពេលជាច្រើនឆ្នាំមកហើយ
ខណៈទីផ្សារពឹងលើប្រទេសជិតខាង
ហើយបញ្ហាមិនដែលត្រូវបានដោះស្រាយដោយរដ្ឋាភិបាល។
អ្នកស្រីបន្តថា៖ «ជានិច្ចកាលយើងពឹងលើទីផ្សារប្រទេសជិតខាង។
គ្មាននរណាម្នាក់ខ្វល់អំពីវិស័យដំឡូងនោះទេ
យើងមិនដែលទទួលបានការគាំទ្រហិរញ្ញវត្ថុណាមួយពីរដ្ឋាភិបាល
ឬវិធានការណាមួយសម្រាប់ការធ្វើអន្តរាគមន៍ នៅពេលដំឡូងរបស់យើងត្រូវបានរារាំងនៅតាមព្រំដែននោះទេ»។
បច្ចុប្បន្នដំឡូងមីស្រស់
មានតម្លៃ៤បាតក្នុងមួយគីឡូក្រាមប៉ុណ្ណោះ។ នេះបើយោងតាមអ្នកស្រី ស៊ុំ
ហៀង។
អ្នកស្រីបញ្ជាក់ថា៖ «កសិករភាគច្រើនបានបោះបង់ការដាំដុះដំឡូង
ហើយចាកចេញទៅរកការងារធ្វើនៅប្រទេសផ្សេង
ហើយនៅសល់តែមនុស្សចាស់ៗប៉ុណ្ណោះដែលមិនមានជម្រើស»។
បើទោះបីយ៉ាងនេះក្តី
មន្ត្រីក្រសួងកសិកម្ម អះអាងថា
រដ្ឋាភិបាលមិនដែលព្រងើយកន្ដើយនឹងកសិកម្មដំឡូងមីនេះឡើយ។
លោក ឡោ រស្មី
អ្នកនាំពាក្យក្រសួងកសិកម្ម បានបញ្ជាក់ថា ដំណាំដំឡូងមីជាដំណាំកសិកម្មធំទីពីរបន្ទាប់ពីស្រូវ
ហើយរដ្ឋាភិបាលកំពុងស្វះស្វែងរកទីផ្សារ និងលទ្ធភាពដោះស្រាយបញ្ហានេះ។
លោកលើកឡើងថា៖ «នៅពេលនេះយើងកំពុងព្យាយាមបង្កើតកិច្ចព្រមព្រៀងជាមួយប្រទេសថៃ
ដើម្បីទទួលបានកូតាសម្រាប់ដំឡូង យើងនឹងព្យាយាមជួយវិស័យដំឡូងតាមរយៈការប្រើប្រាស់ការធ្វើកសិកម្មតាមកិច្ចសន្យា
ហើយវានឹងធានាទីផ្សារតម្លៃ»។
លោកឲ្យដឹងថា
កសិកម្មដំឡូងមីមិនទាន់ស្ថិតក្នុងបញ្ហានៅឡើយទេនៅពេលនេះ។ លោកបន្តថា៖
«យើងនៅតែកំពុងដោះស្រាយបញ្ហាសម្រាប់កសិករ
ហើយអន្តរក្រសួងកំពុងស្វែងរកទីផ្សារសម្រាប់ពួកគេផងដែរ»។
លោកបន្ថែមថា៖ «ដូច្នេះនៅពេលបច្ចុប្បន្នដំឡូងមិនកំពុងប្រឈមនឹងបញ្ហាពិបាកណាមួយនៅឡើយទេ»។
យោងតាមលោក ឡោ រស្មី
នៅពេលនេះមានរោងចក្រកែច្នៃដំឡូងប្រហែល៤ នៅក្នុងប្រទេស
ដែលត្រូវការដំឡូងប្រហែល២០ភាគរយ ខណៈដែល៨០ភាគរយទៀតត្រូវបាននាំចេញ។
លោក ខាន់ សំបាន
ប្រធាននាយកដ្ឋានដំណាំកសិកម្មឧស្សាហកម្ម នៅក្នុងក្រសួងកសិកម្ម
បានឲ្យដឹងថា ចាប់ពីឆ្នាំ២០១៥ ដល់ ឆ្នាំ២០១៦
ផ្ទៃដីដាំដុះដំណាំដំឡូងមានចំនួន ៥៧៣ ៦២៤ ហិកតា
និងទទួលបានបរិមាណផលប្រចាំឆ្នាំមានជាង១៣លានតោន។
លោក ម៉ី កល្យាណ
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានឲ្យដឹងថា
វិស័យកសិកម្មកម្ពុជានៅពេលនេះកំពុងកើនឡើង
ប៉ុន្តែទន្ទឹមនឹងនេះវិស័យនេះក៏មានបញ្ហាច្រើនកើតឡើងជាបន្តបន្ទាប់ផងដែរ។
លោកបញ្ជាក់ថា៖ «វិស័យកសិកម្មកំពុងរីកចម្រើន ខ្ញុំជឿថា
វាមានបញ្ហាច្រើននៅក្នុងវិស័យនីមួយៗ ដែលរដ្ឋាភិបាល
មិនអាចពិនិត្យមើលទាំងអស់បានទេ»។
លោកបានបន្តថា ក្រុមហ៊ុនផលិត
និងក្រុមហ៊ុននាំចេញគួរតែធ្វើការងាររួមគ្នាដើម្បីបង្រួបបង្រួមការដឹកនាំដ៏រឹងមាំ
និងធ្វើការងារជាប្រព័ន្ធដើម្បីដោះស្រាយបញ្ហា និងបញ្ចុះបញ្ចូលរដ្ឋាភិបាលសម្រាប់ការចាត់វិធានការ។
លោកបានបន្ថែមថា៖ «តម្លៃនឹងមិនប្រែប្រួល
ប្រសិនបើយើងអាចធានាការគ្រប់គ្រងលើគុណភាព
នៅក្នុងការបង្កើនទំនុកចិត្តដល់អ្នកទិញ ហើយបញ្ហានឹងត្រូវបានដោះស្រាយ»៕
No comments:
Post a Comment